Leikskóli Snæfellsbæjar

Íslensk veðrátta krefst þess að daglega séu meðferðis hlý föt til útiveru. Pollagalli er nauðsynlegur bæði á sumri og vetri. Aukaföt til skiptanna yst sem innst, einnig er gott að hafa með inniskó.

Í kassanum eiga að vera eftirfarandi aukaföt:

• 2 x nærbuxur 1x nærbolu 2 x sokkapör
• 1 x peysa 1x buxur 1x sokkabuxur/gammósíur
• 1 x bolur/stutt-/langerma 1 x vettlingapar
• 1 x lopasokka 1 x húfa

Hvert barn fær taupoka við byrjun vistunar og er hugsað að þeir pokar séu notaðir fyrir blaut og óhrein föt sem fara heim og ný til skiptanna koma í staðinn og sett í kassann aftur. Þau föt sem þið viljið að barnið sé í úti, hengið á snagann. Merkið öll föt - þau skila sér.

Snæfellsbær er ekki tryggður vegna lausafjármuna nemenda innan leikskólans. Ef gleraugu eða verðmætir munir skemmast er ekki hægt að fá það endurgreitt hjá tryggingafélagi bæjarins. Við viljum beina því til foreldra að fá sér sérstaklega gleraugnatryggingu vegna þessa og ekki leyfa nemendum að koma með verðmæt leikföng og fatnað í skólann

Hvíld hefst að loknum hádegismat.

Í Heilsustefnunni leggjum við mikla áherslu á þýðingu hvíldar þegar talað er um heilbrigðan lífsstíl því svefn er forsenda heilbrigðis á sama hátt og vatn, súrefni og næring.

En á yngri deildunum fara öll börnin í hvíldina, hvort sem þau sofa eða bara liggja og eiga rólega stund með kennurunum.

Rannsóknir sýna að um helmingur foreldra reyna að minnka eða hindra það að barnið sofni eftir hádegi eða vekja barnið í miðjum svefni því þeir óttast það að ef barnið sofi eftir hádegi þá eyðileggi það nætursvefninn. En hádegissvefninn er mjög mikilvægur til þess að barnið fái góðan nætursvefn. Fái barn ekki hádegissvefn verður það orðið mjög þreytt seinni hluta dags og aukning verður á stresshormóninu kortisol, sem undir eðlilegum kringustæðum minnkar á næturnar og eykst svo að morgni til. Þegar barnið verður of þreytt eykst stresshormónið sem þýðir það að barnið á erfiðara en annars með að sofna. Þegar barnið er orðið mjög þreytt veldur það stressi og stresshormónamagnið eykst fyrir svefninn sem þýðir að barnið á erfiðara með að sofna. Skoða þarf hversu margra klukkutíma svefn barnið er að fá í heild á sólarhring.

Góð þumalputtaregla til að meta hvort barn sé að fá nægan svefn er að kanna hversu auðvelt það á með að vakna.

Fólki hættir til að vanmeta svefnþörf barna og oft hafa börn þörf fyrir meiri svefn en þau fá. Hádegissvefn er náttúruleg þörf og hluti af heildarsvefnþörf barns á sólarhring. Meira að segja börn allt upp að 5 ára aldri geta haft þörf fyrir svefn eftir hádegi vegna uppsafnaðs langtíma skorts á svefni.
Að vekja barn í miðjum svefni má líkja við því að taka matardiskinn frá barni þegar barnið er búið að borða helminginn af matnum sínum. Þegar barnið er vakið eftir t.d. klukkustund þá er barnið í miðjum djúpsvefni og það hefur óæskileg áhrif á líðan barnsins í leik og starfi, það verður stressað, pirrað og órólegt sem hefur áhrif á samskipi þess við börn og fullorðna.
Hádegissvefn barna er líka oft kærkomin hvíld frá annríki, hávaða og stressi sérstaklega í leikskóla umhverfi.

Listi yfir svefnþörf barna eftir aldri:

• 12 mánaða börn 14-15 tímar
• 1-3 ára börn 12-14 tímar
• 3-6 ára börn 10-12 tímar