Tröð á Hellissandi
Í Tröð á Hellissandi er gamall skógarlundur, í sérkennilegu og heillandi umhverfi. Tröð er með lítt skráða sögu, en þar ræktaði Kristjón Jónsson tré við erfiðar aðstæður. Minningarskjöldur um Kristjón er í lundinum. Meðfylgjandi mynd af Kristjóni í Tröð var tekin af Guðna Sumarliðasyni.
Í dag er fyrirmyndar aðstaða til að slaka á og njóta fagurs útsýns í Tröð þar sem Snæfellsjökull trónir dulmagnaður í suðri.
Tröðin er í umsjá Skógræktar- og landverndarfélagsins undir Jökli. Hægt er að fylgjast með félaginu á Facebook.
Skúli Alexandersson og Kristjón Jónsson á góðum degi árið 1980.
Opinn skógur
Þann 15. júlí 2006 var Tröð vígð formlega sem Opinn skógur er Einar K. Guðfinnsson, sjávarútvegsráðherra, gróðursetti fallega hlynplöntu. Á meðfylgjandi ljósmynd má sjá hvar Brynjólfur Jónsson, framkvæmdastjóri Skógræktarfélags Íslands, aðstoðar ráðherra við gróðursetningu. Magnús Gunnarsson, þáverandi formaður Skógræktarfélagsins fylgist með.
Við þetta tilefni tók Skúli Alexandersson til máls.
Friðartré
Í júlí 2013 var gróðursett friðartré í Tröð eftir að friðarhlaup hafði verið hlaupið um Snæfellsbæ.
Þetta hlaup er kennt við Sri Chinmoy og er tilgangur þess að efla skilning manna og menningarheima á milli.
Vigdísartré
Í júlí árið 2015 voru gróðursett þrjú birkitré í Tröð. Eitt fyrir stúlkur, eitt fyrir drengi og eitt fyrir komandi kynslóðir.
Þessi tré eru kennd við frú Vigdísi Finnbogadóttur, fyrrum forseta Íslands, og voru gróðursett í tilefni þess að 35 ár voru liðn frá því að hún var kjörin í embætti forseta Íslands, fyrst kvenna í heiminum til að verða þjóðkjörin forseti.
Jólatré
Þegar aðventa nálgast breytist Tröð í sannkallað jólaland, og m.a. eru tendruð jólaljós á reisulegu grenitré sem stendur í miðjum lundinum. Ljósmynd: Lydía Rafnsdóttir.
Loftmynd
Loftmynd af Tröðinni tekin í desember 2024. Ljósmynd: Ægir Þór Þórsson.
Nánar: