Alþjóðaheilbrigðismálastofnunin hefur tilnefnt 7. apríl ár hvert sem alþjóðlegan heilbrigðisdag. Dagurinn er ætlaður til þess að hvetja til umræðu og fanga athygli almennings á mikilvægum heilbrigðismálum. Kjörorð dagsins í ár er umferðaröryggi og markar dagurinn jafnframt upphaf alþjóðlegs umferðaröryggisárs. Í tilefni af alþjóðaheilbrigðisdeginum í ár hefur samstarfshópur opinberra aðila, fyrirtækja og félagasamtaka tekið saman skýrsluna Afbrot í umferðinni. Í skýrslunni er kastljósinu beint að afbrotamanninum í umferðinni og afleiðingum afbrotanna, hvort heldur er fyrir einstaklinginn eða samfélagið sem heild. Þetta efni er alls ekki valið af handahófi enda benda rannsóknir til þess að að flest alvarleg slys og banaslys í umferðinni verði vegna einhvers konar brota á umferðarlögum. Vonast er til að skýrslan gefi heildstæða og raunsanna mynd af eðli og umfangi umferðarlagabrota og afleiðingum þeirra fyrir íslenskt samfélag. Ennfremur er vonast til að skýrslan veki ökumenn til umhugsunar um hversu löghlýðnir þeir eru í umferðinni.

 Togarinn, Ingimundur SH-335, 458 brúttótonna ísfisktogari, strandaði við Vesturboða á Grundafirði á sjöundatímanum í kvöld. Togarinn losnaði af sjálfsdáðum upp úr kl.20 og siglir í framhaldinu inn til Grundarfjarðar. Hringur SH nærstaddur togari var tilbúinn til að koma til aðstoðar ef til þyrfti en til þess kom ekki. Björgunarskip Slysavarnafélagsins Landsbjargar á Rifi, Björg, og björgunarsveitir á Snæfellsnesi voru kallaðar út ásamt því að Landhelgisgæslan var látin vita um málið. Ekki var talin ástæða til að senda þyrlu á vettvang þar sem takmörkuð hætta var á ferðum. Hæglætisveður er á þessum slóðum núna suðaustanátt með 9-13 m/sek.Allir skipverjar eru heilir á húfi og enginn leki kom að togaranum.

Björgunarsveitin Sæbjörg á Ólafsvík og Björg frá Hellissandi vour kallaðar út um kl.13 í dag eftir að aftakaveður gerði í Ólafsvík með þeim afleiðingum að þakplötur losnuðu af 3 húsþökum og 5-6 bílar skemmdust við höfnina eftir að gámar fuku á þá.